Po lès toûrisses

La ferme castrale d’Hermalle-sous-Huy est un bijou dans un écrin de poupées russes. Les trésors s’y imbriquent, s’y déroulent avec un étonnement et un plaisir partagés.

(e rifondou walon po Lucyin Mahin)

Hermåle-dizo-Hu, c’ est on viyaedje metou å bea mitan d’ on payis ahessant pol tourisse, li comiece, li syince, les årts et li spôrt. Inte Lidje et Hu, tot près d’ Tîhondje et d’ Bierzet, c’ est åjhey po-z î avni. Pinsez don : c’ est a 500 metes del nåcionåle N 90. Mågré çoula, li viyaedje fwait çou k’ i fåt po wårder l’ påjhûlisté del campagne.

Li tchestea et s’ grande cinse k’ on pout viziter si trovèt å mitan d’ l’ ancyin viyaedje. Totåtoû, n a des foirt belès måjhones des XVII^e et XVIII^e siekes. Inte di zeles, li cene wice ki l’ mwaisse maçon Jean-Gille Jacob a vnou å monde. E tchestea, vos pôroz admirer des pondeures, k’ on n’ voet k’ la e l’ Urope,et ki rprezintèt les mestîs do bastimint å XVIII^e sieke..

Ene cinse ?
Divins l’ tins, awè ! Li cinse do vijhén tchestea d’ Hermåle, k’ est tot etouré d’ aiwe.
Po l’ djoû d’ ouy, ene pîce d’ ouve po l’ culteure et les tourisses, avou ses muzêyes et s’ bibioteke.

Les bastimints, ki datèt aprume des XVII^e et XVIII^e siekes, recloyèt ene coû pavêye. On l’ a wårni avou des pårtchets d’ fleur. Les efants polèt la djouwer sins risse.

L’ intrêye est å sud, avou ene rampe po les cis et les cenes k’ ont målåjhey roter.
Po-z ataker, gn a ene terasse wice k’ on s’ pout rpoizer. Adon-pwis, ene des pus belès gregnes « so lårdjeur » del Province di Lidje. Elle est 17 m. hôte, 14 m. lådje et 32 m. longue. Elle a troes liveas avou des tcherpintes ki s’ enondèt so l’ costé sud.

Li Sindicat d’ Avizance est a l’ intrêye et vos ploz souner po-z aveur on côp d’ mwin.

Divins l’ gregne, i gn a yeu des espôzucions, des concerts, evnd. Po l’ djoû d’ ouy, c’ est l’ martchî d’ vîs lives di nosse Soce nén recwårlante (S.N.R.) « Li Rawete » k’ a trové djîsse el Cinse dispoy 1993.

Dizo les deus astaedjes del gregne, i gn a l’ taviene, wice k’ on mete so l’ tåve des rcetes do tins passé. Djondant, gn a deus såles, covietes di belès fenès vôsses, wice k’ on trove li Muzêye del Gourmandijhe. C’ esteut les « såles tchaptêyrece » del cinse come l’ a scrît Paris-Match.

C’ est la k’ on a fwait concert et k’ i n a yeu des espôzucions dispoy 1991.

Li costé ess del cinse a stou agrandi e 1856. N a la ene pitite cimintire avou l’ tombe do baron d’ Warzêye d’ Hermåle. A l’ intrêye, on î a basti ene grote di Lourde. Li Muzêye « Posses restantes » î conte l’ istwere del Posse et do scrijhaedje. N a, avou, astalés divins cisse pårteye la del cinse, on botikea di fenès spéçreyes et d’ yerbêyes.

Li pårteye ouwess lait pixhî l’ moton... ca les aiwes sont basses et on n’ ridrove nén avou des rondeas d’ haye !

Li lodjisse del cinse est metou so l’ costé do nôr. Il est wårdé pa ene cwårêye tour, avou ene grande poite k’ esteut dischindowe davance par on pont levrece. C’ esteut la l’ seule intrêye po moussî e tchestea. Vos i voeroz scrît å dzeu del poite li date di 1642.

Li cinse a stou al dibanne dispoy les anêyes 1980. Elle a trové ene novele veye... avou nosse soce, e 1993.

• Les clapantès èspôzicions,
• li martchî ås vîs lives et belès vizreyes wice ki vos handlez,
• del plaece tant k’ on vout po les vweteures,
• l’ åjhmincee po les djins k’ ont pus målåjhey,
• li feu e l’ aisse, li terasse avou ene pitite gofe et des pexhons,
• l’ amagnî sorlon les viyès rcetes do payis,
• li boune ascoye des djins avou on tchén,
• ene båre po loyî les bidets,
• des guides ki s’ î cnoxhèt et ki djåzèt les deus langues do payis (francès et flamind),
• et on wilicome vormint walon...

... tot çoula dene li boune idêye d’ î vni l’ wekene !

Avou ça k’ i gn a toplin d’ ôtes ocupaedjes tot åd dilong d’ l’ anêye !

Avå l’ samwinne, tot prindant radjoû, les gropes nos polèt ossu rinde vizite.

Li S.N.R. propôze des locås sins parey po les radjoûs d’ totes les sôres, des locås si beas k’ il ont-st assaetchî 18.000 viziteus e 1999 et k’ on nd a toplin djåzé dvins les medias.

D’ èn ôte des costés, les cis ki sont curieus atoû des bindes d’ imådjes passèt al cinse po admirer ene pondeure da Jean-Luc Delvaux, do costé nonnrece del cinse, djondant li cwårêye tour (tchåssêye Freddy Terwagne, 132a). Ciste ouve la mostere l’ intrêye bijhrece del cinse, li tour do XII^e sieke do tchestea et des djins des anêyes 1920 : payizans avou ene cårmane di cinsî et des nôbes avou leus vweteure et tchåfeu e-n unifôme…

Jean-Luc Delvaux vina å monde a Indji e 1970 ; il a dmoré lontins a Hermåle, et s’ parintaedje î est todi. I est cnoxhou po ses dessins d’ vweteures, ses climats d’ police et ses lives Le Marquis et Les Aventures de Jacques Gipar.

Vos trovez ossu el cinse des åbes rimarcåves waerantis del Redjon walone : l’ åbe do pindou-neyî et on secoya dendron giganteum.

Voloz fé ene pormoennåde ?
C’ est del cinse ki vs alez triviè les bwès et les tchamps, tot seu ou avou nosse guide. C’ est del cinse k’ vs alez discovri do costé di l’ ess li måjhone del Hèna (classêye) et ene des bônes ki fjhèt l’ aroye inte Hermåle et Clermont. Do costé ouwess, vos montez so l’ Tier d’ Ône (classé), la k’ vos taprez vosse loukeure sol cinse Hotene (XVIII^e s.), sol rivaedje di Mouze, åd divant di l’ abeye do Flône.

Temonaedjes :

Toutes mes félicitations pour votre site en Wallon: y falè el fé hin valet (avec fautes d'orthographe). Si un jour un bouquin Wallon - Français vous passe entre les mains ; je suis amateur. De la part de tous les amis du C.L.P.M.
Proficiate po vosse waibe e walon: el faleut fé, hin, valet !. Si on djoû, vos avoz on motî walon francès, dji so amateur. Del pårt di tos les plankets do C.L.P.M.

Jean Alexis Struyven - djulete 2001 - po mèl

Vraiment une excellente idée que le wallon, sauf que je ne comprends pas tout, car c'est du liégeois et chez moi c'est du picard (patois français) Je visite à l'occasion et me régale des dernières nouvelles.

Linda Kaluzny-Pinon, 39 rue des Fours à Chaux F-49100 Angers
djulèt' 2001 - po mèl