L'istwere del cinse

(e rifondou walon po Lucyin Mahin)

Po l’ istwere di Hermåle, on pout rmonter lon divins l’ tins, mins po cisse del cinse, seulmint a 1642.

C’ est ciste anêye la ki l’ conte Conrard d’ Ursel, mwaisse del signeurreye di Hermåle dispoy li 16 di may 1639, finit d’ construre, come intrêye a s’ tchestea, ene cwårêye tour avou ene flitche et èn årvô.

A hintche : Riconstitouwaedje del tour,
d’après Le Patrimoine monumental de la Belgique, Tome 16/1,Mardaga, Lidje, 1992,
èt li graveure da Rimåke li Leu, 1735 » (å mitan, et agrandixhmint del fliche al droete.)

Do costé do nôrd, li tour a des moyéns po s’ disfinde :

Foto del « berteke » avou l’ date 1642

• ene « berteke » e tawea (1) avou 2 blazons ki dvént poirter les åres d’ Ursel et d’ Roblesse, dizeu l’ årvô (2),
• on pont-levi : (3) ki, rilevé, s’ rabate divins l’ batêye (4) – avou deus colires (5), des deus costés del berteke, po les dbouts bijhreces des londjes (6).

A droete : li mecanike d’ après Viollet-le-Duc.

Cwand li pont-levi est rabaxhî po poleur passer padzeu l’ fossé plin d’ aiwe, i rpoize so ene prumire åtche d’ on pont ki moenne å vî tidje do tins des Romins po-z aler do viyaedje å wé d’ Mouze d’ Ama.

Ci pont ås åtches est co so les plans do cadasse do XIX^e sieke. Il a stou « rtrové » tins des ovraedjes e 2006. Ca il esteut todi la, minme si on nel voeyeut pus ! Catchî pal meur do costé do tchestea et pa on terén d’ distcherdjaedje di l’ ôte… Çou k’ vos croeyoz esse djusse ene alêye epirêye, po-z aler del voye al måjhone, c’ est vraiymint li dzeu do pont.

Conrard d’ Ursel fwait ossu bati ene novele construccion e cogne di « L », djondant l’ tour.

.

Li cinse as XVII^e sieke, dizo Conrard II d’ Ursel

1. Tchestea – 2. Tour d’ intrêye – 2a. Li pont ås åtches – 3 et 4. Les novelès construccions – E rodje : sinse po l’ intrêye å tchestea

li novele construccion, i gn a on lodjisse po l’ cinsî do costé nôr, pu des ståveves po l’ atelêye, po les veas, po les pourceas, etc., avou on grand cina.

Li gregne fwait li scwere avou ene grande poite et tcherpinte e mwairins d’ tchinne.

Li tcherpinte

De costé do sud, i gn a deus tours avou troes astaedjes et, inte eles, sacwants plaeces et deus ståves des tchvås avou des vôsseures å plafon, wice k’ on trove li Muzêye do Bén-magnî (ou Muzêye del Gourmandijhe).

On ståve des tchvås

Cwand li ptit-fi di Conrard II d’ Ursel, Philippe-Albert, conte di Milan d’ Hermåle, vind li signeurreye a Wiyåme do Morea li 20 di may 1704, li cinse pout contni « troes cint motons et bråmint d’ ôte bistoes ».

Li famile do Morea wåde li signeurreye deus djeneråcions å long.

E 1735, li graveure di Rmåke li Leu mostere todi ene flitche po l’ tour d’ intrêye mins ça va candjî et on n’ sait nén å djusse cwand : li pont-levi, ki n’ sieve pus a rén, est prindou foû, les colires ossu et on trawe ene bawete des deus costés del berteke.

I s’ pout k’ c’ esteut dizo les Morea ou dizo les Louvrex ki sont divnous prôpietaires pa l’ mariaedje di Mareye Catrene do Morea a Charles Louis Joseph Ågustin de Louvrex.

Co tins do XVIII^e sieke, on radjoute ene construccion (5), et on a infén ene basse coû pavêye avou ene plaece po l’ ansinî ; ça dene ossu pus d’ plaece po les ståves, et l’ cinse si lome « måjhone del Bovreye ».

.

Li cinse « måjhone del Bovreye » å XVIII^e sieke

E vert : on pré.

Dispoy 1795, Hermåle doet payî li taeye foncire al France ca l’ Principåté d’ Lidje a disparexhou et l’ payis a divnou li « dipårtumint d’ l’ Oûte ». I gn a ene take so les poites et les finiesses ! Adon, on meure les deus fniesses ki sont des deus costés del berteke.

Les finiesses murêyes diski 1911.

Li cinse est sifwaitmint candjeye å XIX^e sieke dizo deus noveas prôpietaires :

E 1807, li veve do baron d’ Hermåle, Mathias Guillaume II de Louvrex si mareye avou Charles-Nicolas-Joseph Warzée et li signeurreye candje co d’ nom.

E 1837, on mete ene poite a l’ intrêye del tour.

.

Li poite rinovlêye e 1994

Tchåle Warzêye est divnou l’ baron d’ Warzêye d’ Hermåle et s’ feme lyi dene on fi ki rind l’ åme a l’ ådje di 38 ans. On l’ etere divins l’ pré, a droete del poite di l’ eglijhe, et cisse plaece divént ene aite (n° 6).

Photo tombe

Cwand Tchåle Warzêye d’ Hermåle trepasse, on rvind l’ signeurreye. Li mayeur d’ Indji, Tchåle Mareye Louiws do Potesta d’ Indjimont, li ratchtêye e 1853 et ratake des ovraedjes – loukîz les plans do cadasse di 1856.

I n’ a nén co des otos, mins li tchåsseye Hû-Lidje a divnou pus impôrtante k’ l’ Djerêye (li vî tidje do tins des Romins) ; adon on va moussî divins l’ tchestea pa ene ôte intrêye - e rodje.

Li cinse après 1856. E fucsiya : les novelès intrêyes po l’ cinse

6. L’ aite divins l’ pré - 7. On rewale l’ aiwe – 8. Passaedje clôs
9. Agrandixhmint – 10. On novea meur – 11. Èn ôte novea meur

Do costé sud, å dfoû, on rbastixh on novea meur di brikes, pus d’ 2 metes hôt, e dimey rond, ki retoure on dmey ceke pårti e 2 bokets (10) ; On intere el cinse pa on poirtå d’ bwès.

On ôte novea meur va disk’ al tour coinrece sud-ess avou ene ouxh (11).

On rewale l’ aiwe do costé nôr (7) et l’ grande tour ni sieve pus d’ intrêye po l’ tchestea mins mins seulmint po l’ cinse ; et on clôt l’ passaedje inte li basse-coû et l’ coû do tchestea (8).

Li cinse est cwite del mitan do costé sud k’ est rpårtaedjî e deus pa l’ signeur et esse ragrandi avou on grand manedje. Adon, po fé bouf, on ragrandit l’ cinse do costé di l’ ess, so l’ pré… mins nén so l’ aite !

Li novele divanteure do costé ess est di stîle industriyel, avou on poncea aveule ki vént foû pa padzeu d’ l’ aite.

1856 : Façåde di padzeu l’ aite. Di dvant et d’ costé.

Après 1862, li pî est catchî po ene « grote di Lourde ».

A hintche : li pî del façåde maské pal grote di Lourde.
Al droete : li minme divanteure « discrestêye » après 1964.

.

Inte 1984 et 1990, on tape li copete al valêye – assuré po k’ li rifjhaedje do toet soeye meyeumartchî. Dandjreus po l’ minme råjhon, on candje li copete d’ ene tourele divins l’ coû dvintrinne.

Li cinse a djouwé on grand role 200 anêyes å long.

C’ esteut on loyén inte les djins då viyaedje et l’ signeur ; cåzu tot l’ monde (omes, femes, efants då viyaedje) î a ovré ou djouwé, et elle eployive ossu des Flaminds et des etrindjirs pol såjhon des petråtes. C’ esteut ossu l’ plaece wice ki l’ curé et les vijhéns vinént poujhî a l’ aiwe, wice k’ les djins då viyaedje vinént po s’ distraire, tchacser ou dvizer d’ traze a catwaze.

C’ esteut la k’ li club po pign-ponk a stou creyî. Et c’ est la k’ n aveut des rezistants ki s’ catchént.

Après 1964, l’ ovraedje a rastrindou pu stater, ca i gn aveut pus des teres assez. Paski l’ famile de Potesta aveut stou esprôpriyeye di toplin d’ ectåres po-z î fé on zonigne.

Adon, li cinse n’ a pus stou etertinowe et s’ digrognter.

Après l’ moirt do baron Edwård di Potesta, li tchestea et l’ cinse sont dins l’ indivizion ; li 21 di nôvimbe 1985, onk des ptit-pitit-efants, Philippe di Potesta, les ratchtêye.

Mins li 23 d’ djun 1989, i rvind l’ cinse tot seule. Ene anêye pus tård, l’ atchteu li rvind a des djins ki fôrmèt ene coperative po l’ såver.

Li ranovlaedje kimince e 1991, et po les Djournêyes do Patrimoenne e moes d’ setimbe 1991, les djins ont polou viziter l’ gregne avou ene espôzucion d’ belès afwaires di coujhene. Les djins fourît amakés pal beaté del tcherpinte et l’ grandeur del plaece. Vola çou ki fwait l’ troye danser.

E 1992, li coir di lodjisse est lodjåve et ocupé.

E 1993, li soce « Li Rawete » trove djîsse al Cinse. Et aidî a rmete les bastimints d’ adroet, a fé cnoxhe les ritchesses do do bén-magnî did divinltins tot rapoûlant et rmete e-n estat les documints et tot çou ki toûne åtoû d’ l’ amagnî, del toubak, di l’ istwere et del couhene (pår el Beljike et copuvite el Walonreye).

Ele creye ene ritche bibioteke, des muzêyes foirt interessants, li taviene la wice k’ on mete sol tåve des rcetes do tins passé et des pormoennådes.

E 2008, avou l’ aspoye del comene et des conseyîs del province di Lidje, ele dimande li clasmint del cinse come « monumint istorike ». Mins ele ratind co e 2015. I s’ î faleut atinde...

Li cinse, c’ est portant li memwere del veye d’ on bastimint 4 siekes å long. Elle est foirt interessante po les cis ki studièt l’ årtchitecteure. L’ indjerioresse Brigitte Van Hemeryck a dayeur tchoezi l’ cinse come sudjet po s’ TFE do s’ mwaistrijhe complemintaire e « Conservation-Restauration du Patrimoine immobilier » (Institut do Patrimoenne walon, Ama) ca i gn a totes sôres di vôsseures divins l’ cinse :

Tèmwègnèdje :

Il a fallu aux propriétaires et amis de ces lieux beaucoup d’audace, de courage et de persévérance pour sauver, restaurer, entretenir et embellir ce lieu chargé d’histoire, plutôt que d’en faire un parking ou un immeuble de rapport, comme trop d’autres l’on fait par ailleurs par pur profit. Qu’ils soient remerciés de leur travail et de leur amour du patrimoine.

Bruno Heureux, 9 di may 2003,
po l'espôzicion « Simenon se met à table »